Комбу Сайлыкмаа Салчаковна
Сайлыкмаа Салчаковна Комбу – башкы, шүлүкчү, очулдурукчу, литературовед.
1988 чылда аныяк чогаалчыларныӊ литературлуг конкурузунуӊ лауреады, 1991 чылда «Ужук» деп ному дээш Донгак Барыкаан аттыг литература шаӊналыныӊ бирги лауреады, 2006 чылда А. Фадеев аттыг бүгү Россия чергелиг литература шаӊналыныӊ лауреады болгаш алдын медальдыӊ эдилекчизи, «Бай-Тайга кожууннуӊ хүндүлүг хамаатызы» аттыӊ эдилекчизи. Тыва Республиканыӊ культуразыныӊ алдарлыг ажылдакчызы.
Кызылдыӊ эмчи училищезин, Кызылдыӊ курунениӊ педагогика институдунуӊ орус дыл болгаш литература факультедин, 1990 чылда марксизм-ленинизм университединиӊ журналистика факультедин дооскан. 1995-1998 чылдарда Россияныӊ Эртемнер Академиязыныӊ Москвада Делегей литературазыныӊ институдунуӊ аспирантуразынга ɵɵренгеш, амгы тыва поэзия талазы-биле эртем ажылын камгалап алган.
Бирги шүлүү «Ойнаал, эжим» 1977 чылда «Тываныӊ аныяктары» солунга парлаттынган. 1994 чылда ийиги ному «Сайдаяк» бичии номчукчуларга белек болган. Дараазында эрте-бурунгу кыдат поэзияныӊ очулгазы «Мейхуа чечээ», «Тыва сонет антологиязы», «Ийи эрик», «Угбашкылар уран ыры» деп делегей поэзиязындан херээжен лирика дургээ, «Шуурганныг дүн» деп рубаилер ному, «Тыва литература» деп словары, «Оглумга чагаа» база «Өлчейлиг ɵг» деп номнары парлаттынган.
Сайлыкмаа Салчаковна Комбу «Тыва челээш» деп сайтыда чогаалчыларның кыска допчу намдары болгаш биобиблиографияларын чыып белеткээр ажылдакчызы. Амгы үеде ында 14 чогаалчыларның дугайында материалдар бар. Оларның аразында Степан Агбанович Сарыг-оол, Николай Алексеевич Сердобов, Экер-оол Дулушевич Кечил-оол база оон-даа ɵскелер бар.
Г. Принцеваныӊ «Шаанак», Турсынай Орозбаеваныӊ «Тɵрээн ховум», бурят чогаалчы Чойбоновтуӊ М. «Өӊнүктерим – мээӊ дириг бурганнарым» Н. Лугиновтуӊ «Чингис-Ханныӊ дужаалы-биле» деп романыӊ, Муса Джалильдиӊ «Моабит кыдыраажы», Наталья Харлампьеваныӊ «Кызыл хек-даван» деп номнарын тыва дылче очулдурган.
Шулуктери орус, моол, турк, алтай, чуваш дылдарда үнген. Тыва дыл кырынче орус классиктерниң шүлүктерин очулдурган: А. Пушкин, Н. Некрасов, Ф. Тютчев, А. Фет, Сапфо, А. Ахматова, М. Цветаева, Б. Ахмадулина, Т. Добрынина.
С.С. Комбу Россия Федерациязыныӊ болгаш Тыва Республиканыӊ Чогаалчылар эвилелиниӊ кежигүнү, Россия Федерациязыныӊ журналистер эвилелиниӊ кежигүнү.
